（作者臉書，標題轉貼所加）
美斯事件，中港引起軒然大波，去到日本，反應平靜。日本網民宣稱：其實我們歡迎的是美斯隸屬的整個團隊，睇波睇全局，一個球王巨星，冇可能代替全部11個隊員。
對於中港盲目追外星，自己香港隊一樣系上場表演，備受香港人冷落，日本仔實在唔明系乜嘢心理。日本網民心平氣和咁話：冇咗美斯，我哋一樣歡迎。
因為即使冇美斯，人哋成對波仲有蘇亞雷斯、巴塞前隊友恩尼斯達，後衛阿維雷斯，全部都系高手。
過年睇賀歲片「飯戲攻心2」，據說冇咗個香港港產片楝篤笑版天王美斯。咁張繼聰就順理成章變咗蘇亞雷斯擎天一柱，頂返住個場。
上集講大佬黃子華個前女友Monica(Stephy)比二佬張繼聰上咗，三弟就有另外嗰個女廚神Josephine，大佬一個人撐起成套戲。第二集冇咗子華神，就變咗群戲。同一個導演陳詠燊，好似足球隊教練，又如何操返一個完全不同結構的陣容呢？
老實講上一集黃大佬個角色都已經去到盡，所以今集安排佢去咗非洲拍攝野生動物，剩返兩個細佬搞婚禮Event。邀請埋以前同父異母嘅上一代到場，交代返上代老竇老母婚外情私生活混亂生野仔的世代因緣，即系補白前傳，乘機加埋胡楓、羅蘭、米雪、黎彼得成班甘草？出場做後衛，中間搭多一個中場謝君豪，而原班男女打前鋒，完全以另類喜劇形象出現，加?加料變成一直盆菜賀歲宴，咁嘅Menu，識得咁樣執生，熱鬧繽紛，戲未到一半已經成功，令觀眾唔記得咗黃子華的不存在，亦都好聰明。
班前輩到場出席婚禮，果然冇令人失望，尤其羅蘭坐輪椅到場嗰段Gag扭笑位甚勁。而事隔一年，張繼聰在上集俾大佬壓住，個角色天生有自卑感，今次終於出頭，亦另見演技系可以混合鄭中基同少少港產片戇豆先生的新路向，將來亦有發揮前途。
而Stephy做的那個女文青變身保育創意產業話事人，喺上一集氣勢拍得住鄭秀文，今集以前大嫂的姿態出現，更加有兩分梅麗史翠普嘅成熟氣場。
至於王苑之在今集亦成功變身阿姐級，主持另一條「仙鶴神針」煮飯線，開埋精品飲食綜藝節目嗰條路，成套戲亂中有序，加返條隱線，添加色香味。
上集系講一個家庭三兄弟爭論賣樓離開，高潮戲的一場飯局，食食嚇飯，兩兄弟發現情慾錯配真相，憤怒反台。黃子華就離開咗嘞，今集就講留下來的，到底喺香港點樣自處？上一集「離」，今集講「合」；上集喜中有愁，續集喜中有樂。
兩年以來選擇離開咗香港的BNO與海外港人，可以在續集中見到香港尖沙咀維港新冠後解封最新景色狀態，高樓大廈一樣，個靈魂仲剩返幾多？
最估唔到系用青春新進女星廖子妤，做返張繼聰個亡母，在現實年齡中應該系兩父女，戲中母子跨時空幻覺相遇，一啲都唔覺得突兀。
見到今日香港體育界備受欺凌，香港足球又慘遭邊緣化，氣氛極度畸形，香港電影在種種壓抑之下點樣苦中作樂？留低的香港人又可以點呢？尤其系有啲知識專業技能嘅下一代。所以在海外睇返飯戲攻心2，就在喜樂之外，喺溫哥華倫敦曼徹斯特睇返銀幕上香港進入「美斯大仇恨時代」嘅維港山海，百感交集，就必有各自嘅弦外之哀了。
