「而家成個銀包得番10蚊，應該可以夠我環遊世界！」，年僅16歲的「暴龍」苦笑道。一場反送中運動，叫這位中學生失去快樂的暑假時光、親密的家庭關係，更近乎耗盡所有積蓄。本可和朋友聚會用膳，卻只能瑟縮在家，不費一分一毫，在網絡世界收發抗爭資訊；等到周末，拿起頭盔和口罩，把所有精力花在抗爭最前線，買支水也捨不得。看着一位又一位年輕人被控暴動罪，深知被捕風險的他握着那唯一一張紙幣說：「我都做好心理準備，有機會坐10年監。」
由6月9日開始，「暴龍」幾乎沒有缺席任何一場「反送中」運動，「6.12我企喺（解放軍）軍營對出，食咗4、5粒催淚彈……」首嘗警方武力時，他那顆反抗的心未燒得最熱，直至6月21日從早到晚包圍警察總部，「我就上咗警總前線架鐵馬，之後有人叫我走……返到屋企睇到直播，見到手足俾人包圍……就非常心痛、心酸」。
見證警察向示威者肆意濫暴，激發他越走越前。要衝鋒陷陣就要有裝備，他前後用過3個頭盔，全是前線物資站供給。至於防毒面罩，就有熱心人透過中間人表示願意資助，於是他拿着金錢走到五金店，硬着頭皮說要買，「老闆一聽到就知我去邊度，打咗個7折畀我哋。」
不計受捐助的錢，「暴龍」的積蓄一直只有40元。「返學嗰陣，（家人）每日會畀30、40蚊，有時都已經要問朋友借錢食飯……放暑假唔系日日畀，好多時都留喺屋企，喺屋企搵嘢食……有時朋友約我去飯局，我都去唔到。擔心遲啲會冇曬朋友。（點解？）因為我抽唔到時間陪佢哋。」到要抗爭的日子，他早上在家儘量吃飽，然後走到最前線幫忙，不斷的跑動和忙碌令他全情投入，忘卻了飢餓和口渴，直到回家才再吃飯。「7.21晚我喺林士街停車場對出，我企到防線嘅第二排，拎住盾，幫手頂住，撐到12點先走，全日冇食過一啖飯、冇飲過一滴水……其實我應承過唔會企前面，但唔知點解會越企越前，解釋唔到，但一啲都唔驚、唔累。」
即使再慳，他儲到的錢始終有限。「6月26號嗰個禮拜，（家人）直頭冇畀零用錢。（家人知道你去抗爭？）系。」辛苦儲下來的零用錢隨即歸零，之後斷續下來，始終儲不到100元；7月21日後，他的錢包更連續個多星期只剩一張10元紙幣、一張八達通、一張身份證、兩張抗爭支援資訊卡片。堅稱不願意接受現金援助的他，最後也迫於無奈接收來自有心人、總值300元的現金餐券，「不過到而家都未用，因為要慳住使……因為一定有啲時候，有啲朋友要幫助，到時我可以幫佢。」
「暴龍」說，媽媽始終反對他參與抗爭，這個半月以來，母子關係陷入前所未見的谷底。「（家人點講？）例如話，『如果你繼續咁樣，我就報警拉你同唔畀錢你。』（真系話要拘捕你？）系。甚至有警告過，會去前線舉牌叫我返屋企，牌上面會有我個名。」他儘量避過家人耳目，例如把裝備收進房內最隱蔽位置、趁家人不注意時一口氣衝出家門，「不過試過返到嚟，都未開門佢已經鬧緊。（會鬧乜嘢？）話我搞亂香港，現今社會好地地，做咩要爭取啲咁嘅嘢呢？覺得我嫌命長。（作為兒子聽到這番話，系咪特別心痛？）系，但冇喊到，因為有更重要嘅嘢值得我關注。」
他認為自己一直在做正確的事。「呢個政府咁衰、警隊咁衰，呢個仇，點可以唔報？」逆權運動持續近兩個月，他稱只能延續各種可行的手段，保持反政府情緒，「集會我會去、勇武我會去，唔使再諗再揀，行出嚟先至有用。」
有44名參與7.28上環衝突的人士被控暴動罪，其中2人和「暴龍」一樣未成年。被問到是否害怕牢獄之苦，「暴龍」的笑容一點也不苦了：「有諗過，但系我唔擔心……因為我都預咗俾人拉，我都做好心理準備，有機會坐10年監。（點解？）因為呢個系革命。」再問如何作心理準備時，他先是語塞，後再答：「冇，keep住做住心理準備……。」
