小康之家的睡房內，大學生阿芝握着一個裝了水的膠樽，反覆練習投擲的姿勢。為免驚動家人和弄壞房中物品，她不會將水樽掟出去，只是想身體牢牢記住那個投擲的動作和角度，「因為我好驚掟到隊友或記者。」
臂要直，揮動幅度不用太大，樽要反手拿，才擲得遠。她搜集抗爭現場的影片看了又看，觀察用不同姿勢擲出燃燒彈的效果，務求在防暴速龍怒奔、群眾逃跑、記者走位拍攝的千鈞一髮間，將手中的「魔法」準確地擲到警員和示威者之間，順利爆開、起火，而不傷及無辜。
當警方用水炮車、真槍實彈等致命武器已成常態，抗爭者亦越來越多用火阻止警方推進、甚至偶作反攻。他們稱燃燒彈為「火魔法」。
由夏入秋，香港的街頭由200萬人，剩下十多萬，甚至很多時只有一萬幾千。大學生阿亨在前線一回頭間，身邊只剩與自己年紀相若、甚至更小的中學生，手腕比手中鐵通還細瘦，堅決而不知所措。拿着火魔法的他看不到有後退的空間，只想問，大人們是否還要繼續留在自己的 comfort zone？
「火可以用來進攻，可能救回幾百個手足的前途，亦可能系我哋最後一條防線。手上那支火，唔單單系武器，仲系香港人嘅勇氣、希望、反抗嘅意志。」一名已被捕而無法受訪的魔法師傳來這段文字給記者。
縱火的最高刑罰是終身監禁，比暴動罪的十年重得更多。八月初，火魔法師只是零星出現，但隨着警暴升級，目測估計會用火魔法的示威者已增至數十人，但同時他們亦面臨最嚴峻的搜捕。《立場》輾轉接觸到其中三位，了解他們抗爭升級的歷程。
***
學校沒教的一堂化學課
7.21除了元朗白衫人恐襲，還有兩項當時未必為意的標誌性事件：上環第一次有示威者用雜物燃起火堆作路障；民陣遊行後直搗中聯辦的隊伍中，群眾齊聲高呼「光復香港、時代革命」。這口號之前只有部份年輕人會喊，但那天，終於在充滿和理非的遊行隊伍中成為主流。
阿亨和身邊的前線朋友聽在耳中，覺得鼓舞，「大家的思維原來已經進步了，願意講出『革命』兩個字。咁，如果你有革命嘅條件，實際上都要做到武力升級。」他記得之後7.27光復元朗，前線在鄉黑刀手襲擊的陰霾下仍士氣甚佳，很多小隊開始討論火魔法。8.5七區三罷，灣仔警總外便有人擲出兩顆燃燒彈。
製作原理簡單，「玻璃樽裝了電油加食油，跟住插布條，點火，掉埋去就着。」阿亨說這種基本款不少前線朋友都略有認識，抗爭者群組也有介紹。
（圖中並非本文受訪者）
綜合網上資料和討論，白電油比汽油容易買到，但用汽油燒起來會較大火；加入麵粉、砂糖等可提升燃燒時的熱度和持續時間，加入白磷則會令擊發時火勢更猛烈，可令火團擴張到至少半米範圍，並會將物件燃燒至盡才熄滅。然而其危險度高易生意外，白磷在香港的買賣受限制，極難取得，用白磷的魔法師並不多。初階者也大多用比較易買的白電油，故嚴格來說不是「汽油彈」。其他原料基本上超市有售，「而家已經進化到，都唔洗一班特定的火魔法師，有啲細路自己帶住兩樽去，拎出嚟就掟。我估佢哋都系上網睇到就跟住整。」阿亨說。
另一位「火魔法師」阿芝說，現在有時買白電油和汽油都會被商戶要求登記身份證，故在準備原料的環節已有風險。隊友試過買完後被不明人士跟蹤，雖然沒被捕或搜身，亦非常驚險；也試過準備好物料帶出去時離遠見到警察，惟及時將袋放在隱蔽地方。阿芝本人則尚未遇過搜查，「佢哋好少俾我帶，都系叫我帶啲玻璃樽、毛巾、砂糖麵粉咁。可能我系隊入面唯一一個女仔，佢哋好唔想女仔有事，始終......女仔入到警署之後危險系大啲。」
J是火魔法的新手，十月才第一次用。由於不熟手，會選擇先混好「魔法水」帶到現場用，「如果到現場先拎個漏斗出來慢慢倒，好似搞唔掂。」但阿芝所見，都有不少人是即場做，「近幾次出去發現，好多後排的和理非，書包里都會有一兩樣物料準備咗。佢哋可能唔敢整或者無機會整，但知道有魔法師在場都會即刻將材料俾曬我哋，對上嗰次系多到有盈餘要帶返屋企。」
「魔法師」的手勢
受訪的三名「魔法師」都是大學生，今夏之前莫說汽油彈，連磚都沒掉過。阿亨落場用之前只練過一次，「大概知道個手感系點就去。風頭火勢，都唔想帶咁多次出去練然後提升自己被捕風險。」
他觀察到通常「火魔法師」的意外都是燒到自己，「手臂伸到好後成個膊頭 fing出去嗰啲呢，因為掟磚系哩個手勢嘅，但火魔法有個大火頭，你將個火頭離開咗自己視線範圍，個人就好易着火。我都試過一次件衫着咗少少。其實火魔法輕過磚好多，重點系掟得准。」
阿芝則在家模擬練習，「睇咗好多次啲片，發現問題系佢哋只手伸得唔夠直，投擲距離就會好窄。同埋反手拎樽會易啲發力，可以掉遠啲。」在家不能把樽擲出去，沒有示威的日子，她就和隊友找片空地掟水樽，「試多幾次會知道自己可以掉到幾遠、力度系點，就無咁易失手。始終火唔系咁易控制嘅嘢，我真系唔想整親自己人、記者、或者消防同 first aid，所以做咗好多功課。」
J試過和隊友帶着「魔法水」到荒山野嶺試用，途中與幾個警察擦身而過，「嗰嚇真系驚到痴線。幾個後生仔帶着白電油和汽油喺身，佢哋一定知道你想做乜，都預咗有咩事即刻跑。」
那次幸運地沒被搜查，但他不知道運氣幾時會用完。「其實而家帶好多嘢都要冒險，比如頭盔眼罩豬嘴，本身你帶出去保護自己，只帶一套的話，佢拉你返去坐48個鐘就無事，唔會告得入咩罪。但帶多套就麻煩喇，我都有做哨兵，有大聲公同哨子，哩啲都有機會俾人告煽動。之前有把錘仔、鉸剪、士巴拿，佢已經可以話系攻擊性武器，條罪都系大嘅。」
***
「終於喺哩場革命之中，有我存在嘅價值」
冒着極大的風險和刑責去用火，本應是個困難的決定，但隨着六月開始的事情發展下來，他們三人都彷佛順理成章就走到這個位置。
阿亨和阿芝五年前參與傘運時都是中學生，見證過和理非模式的失敗，今年6.9反送中遊行都沒意欲出來。第一次出是6.12，「見到中信對出民陣嗰個和平集會都被清場，好多人無 gear都被迫食催淚彈，幾乎人踩人，」阿芝說，「我就知道今次件事唔似2014年咁簡單，決定之後每一次都要參與。」
起初只是和理非地充人數、傳物資，見到催淚彈就跑走，到後來鼓起勇氣追着催淚彈去滅煙，只是一、兩個月間的事。但阿芝還是覺得不夠：「每次返到屋企睇新聞，都見到好多前線手足一系受傷、一系被拉，覺得自己好無用，咩都幫唔到手。」當 telegram群組有人提議升級做火魔法，她感到挺適合自己，「始終我系女仔，又唔高大，又唔夠人打，上前線都只系負累，不如揀個靈活啲走位嘅職業。」並非沒有思想掙扎，但掙扎的時間很短，「可能我一早就覺得和理非無用，只不過未踏出嗰一步去實行，思想上應該系已經準備好嘅。當時考慮嘅只系，哩樣嘢我有無能力做到？」
八月底她首次與隊友拿着「火魔法」上前線，算是較早的一批「魔法師」。因為第一次用怕失手，她沒在最危急的關頭丟，而是雙方對峙期間、催淚彈不斷射到前線的時候，就將瓶子擲到警方防線前面。一剎那，玻璃碎裂，火成功的燃起來。「開頭我以為我會好驚、唔敢掟出去。但去到嗰一刻，嗯，我淨系覺得，我終於喺哩場....我諗而家可以叫做革命？喺哩場革命之中，有我存在嘅價值。」
到九月中，實地用了四、五次後，阿芝感覺越來越純熟，可以掌握到擲出去的最佳時機和角度。通常她會站在第二至四排的兩側，每當警方推前，就用火作屏障為前線爭取撤退的時間。「10月1日屯門有個魔法師系用火用得好靚。當時速龍衝出嚟捉人，但佢離遠掉咗個魔法過去，個火蔓延得好快，成隊防暴同速龍就煞停咗，嗰度嘅手足系全部撤退曬走得甩。我哋最理想就系希望可以每次都做到咁樣。」
10.1街頭（立場新聞圖片）
「其實好多前線都唔系真系特別大隻、特別捱得，但次次都保護後排嘅和理非同街坊走先，自己就拎住啲爛木板、浮板同遮嚟硬食啲子彈同催淚彈。佢哋唔系對哩啲嘢免疫，真系硬食架咋。咁，我哩啲上唔到最前嘅人，都起碼用火幫手築嚇防線。」
儘管不是最前排，火魔法師也面對很高的現場風險，「佢哋見到你拎住支嘢，都幾突出嘅，會用槍瞄住我哋嚟射。我哋一開頭未夠經驗時就系太猶疑，跟住有隊友中咗彈囉。而家一揀到個適合位置就會即刻掉，無乜考量同猶疑嘅餘地。你想贏，想保護你要保護嘅人，就要掟出去。唔可以驚，唔可以退縮。」
火的能與不能
阿亨的覺悟來得更早。2014年他在旺角見過黑幫流氓的兇狠、在龍和道見過警棍打落手無寸鐵的市民頭上。2016的農曆新年，他去旺角篤魚蛋，但在本民前和其他抗爭者行動之前，就有人發現他「未夠秤」，叫他早點回家。2019，他終於成年。6.12那天，有感自己食過催淚彈，覺得可以應付；未料迎面而來的是各式槍械，橡膠子彈、布袋彈、海棉彈，全部平射。「嗰日之後我就好清楚，佢哋系有預謀要開真槍去鎮壓我哋。然後我就接受咗哩個現實，好自然咁上咗前線。」
七、八月每個周末不同的地區遊行，阿亨發現，「我哋只系重覆 set路障、頂住，然後防暴沖埋嚟、擋，跟住前面就無咗四、五十個手足。無可能咁樣運作件事。」他認為必須要武力升級才有機會贏，尤其八月初開始警察就改變策略，由結陣對峙改為突然急奔上前抓捕，再沒空間容許示威者慢慢用索帶扎路障。
這時候前線開始討論用火，阿亨沒太多猶疑就加入「魔法師」行列，「火系好實用嘅，而家見到好多路障都會用火燒，因為快過扎索帶好多。真系擺一堆雜物、淋啲油，一下子個火就着，大家退得快好多、走嘅空間多好多。」
「第二就系，佢哋真系會驚囉。」阿亨通常會留到最後才走，與防暴速龍最近的距離是10米，「佢哋沖得好狠，但多數捉落單同睇落瘦弱嘅人，見到你手上有火，起碼兩、三個人先夠膽埋嚟。其實佢哋系好鍚身，有火喺佢哋附近爆開，佢哋會避一避，沖慢咗。咁唔會真系傷到佢哋啲乜，但至少可能令到....起碼心理平衡啲囉，等我哋有得做。」
阿亨所見，群眾對「火魔法」的接受程度頗高，「現場系拍曬手咁，掟中警察大家仲歡呼添。」10.1那天，抗爭者直接在現場炮製「火魔法」，一群中年街坊甚至即時在便利店買酒飲，飲完就把玻璃樽傳出去。「我諗所謂民意逆轉，系喺屋企睇電視嘅人就可能接受唔到。如果真系去過現場，對運動有實感，就會知道根本唔系所謂嘅示威者同警察對戰。只不過系示威者頂到幾耐得幾耐，跟住示威者被屠殺。」
但禁蒙面法通過後，火的應用開始去到燒「黑心」商鋪，阿亨就有點保留，「覺得件事有少少失控，我明大家都衝動、都好有情緒。幾個月前件事系幾好嘅，當有啲機構企業話撐警，就好多和理非日日去貼 memo、噴嚇字。但有次喺灣仔，有人掟個火入去 Starbucks。嗰度系大廈第一層嚟，真系可能傷到普通人，咁我就唔同意囉。我不割席嘅，但我自己唔會做。如果有個汽油彈，掉入去政總好過啦。放火燒鋪，我哋損失嘅民意支持會比得到嘅嘢多。」
***
「如果每個人都勇敢啲，可能已經贏咗」
當燃燒彈逐漸成為例牌菜，抗爭陣營中有種感覺：我們終於跟外國的示威者看齊。看過《Winter on Fire》者，甚至可能幻想香港人會跟同樣用火的烏克蘭人一樣，勝利在望。但阿亨覺得這是好大的誤解，「其實示威者同警察仍然系完全無得打。」防暴警身上的綠衫隔火，即使掟中，拍一拍就熄，「而家問題系，就算夏愨道有幾十萬人，而對面有500個警察嘅時候，我哋都系俾人殺到片甲不留，跟住之後再少80至100個手足咁，因為認真進攻嘅都只系得7、80人。」
J加入成為「魔法師」，最直接的原因也是見到「唔夠多人」。他今年暑假才考完文憑試升大學，由六月至七月都是主要去民陣遊行的和理非，連6.9遊行後占路、7.1沖立法會都有點保留和不理解。「但慢慢見到，依個政權真系無打算向人民屈服，前線又好多人被拉咗，越嚟越少真勇武，咁我覺得自己有能力做到嘅，就幫手出一分力囉。」於是，8.31他開始站前一點，九月中，他第一次掟磚。
9.15「岳義士」在北角打警察、搶回幾個原本會被捕的示威者，對他來說是很重要的示範，「佢喚醒咗我哋，『打狗救人』唔好淨系得句口號，真系要落手做。如果每個人都勇敢一啲，可能我哋已經贏咗。」九月底掟磚開始掟得准之後，10.1便掟出個人第一支汽油彈，雖然只是試，擲在警察前好幾米的空地，「都系人生一大步。」他有點抱歉的說，「我哩啲新血上嚟勇武，其實都唔系太知點做。」
踏入九月，本應回歸校園。前線抗爭者卻越來越年輕，經常出現中學生的身影。
阿芝的感覺是，前線人數不算減少，但有經驗的人少了，「有一群先鋒系少咗，好多原因啦，可能俾人拉、或者逃亡咗。而補上前線嘅人經驗唔夠。」阿芝隊中8個人，現已拉剩5個，「我自己又整親，有個朋友都受咗傷。所以，有時都會諗，香港人嘅勇武系咪已經到咗頂呢？連火魔法都出咗，下一步仲可以做咩？整炸彈？炸彈嘅話，又會系點樣用？7.21上環第一次用火嘅時候，都好多人話唔美觀呀、真系變咗暴徒呀，要一段時間先可以說服到嗰班人返返嚟、唔割席。」
「但暫時嚟講，我有啲覺得自己已經到咗頂喇。我嘅能力，已經盡咗，唔知再可以點樣付出。我未想像到我好主動咁去攻擊人，因為我做火魔法嘅原因都系想保護前線手足，唔系想令對面全軍覆沒或者死。哩個心態可能令到我限制咗自己。而家形勢一日一日咁變，所有消息都太多太快。我會覺得系...而家個社會、而家個政府迫大家成長囉。所以哩個問題，我未有答案，或者你下星期、下個月再問我，我又成長咗，諗法唔同咗，又或者可能我已經俾人拉咗。」
又變「學生運動」？
阿亨對於這次運動的結局，傾向悲觀，「我覺得今次大家未必趕得切，可能再五年後？當大家再接受多啲、或者當個情況再差啲，真系會有機會。但個問題系，當我哋好成熟咁用火魔法，佢哋就會好成熟咁用真槍。」他頓了一頓，「但…我系…你用真槍我就着防彈背心嘅感覺，系囉。」
「有樣嘢我好唔開心嘅系…我真系見到啲細路喺前面，系真系唔夠18歲嘅，拎住支鐵通，但條鐵通仲粗過佢只手。好明顯系想出一分力，但佢哋都唔知自己做緊啲乜野，跟住好易就俾人拉咁。」
「六月嘅時候，系成個社會對抗緊極權，但之後大家又好似變返雨革咁，系支持年輕人對抗極權，上一代又縮頭，我自己好討厭哩樣嘢，根本就系偷換咗個概念，好似變咗你落淚、你喺屋企話支持年輕人，已經好好咁，每一次嘅運動都系咁…我唔怨恨佢哋嘅，但你以前有機會嘅時候都無做到，唔可以因為你而家唔再系最年輕嗰一代，就覺得只系年輕人嘅事，你只系去支持佢哋，一定要成個社會參與先有機會成功。」
和理非不再上街，很多原因：有包袱、無不反對通知書，無地鐵無車搭，也有一些，不認同勇武升級的抗爭路線。但阿亨和阿芝都覺得，面對警暴和真槍實彈，前線沒有不武力升級的選擇；而且勇武升級是在200萬人都遊行過而沒有回應之後的事。「五年前我都曾經以為，坐喺條街度就會有改變，」阿亨說，「嗰時大家咁眾志成城，你覺得，就算一個偽民主政府，都唔能夠咁樣漠視民意呀？但原來唔系，佢系一個極權政府。咁五年來，人民贏過幾多次？最多都系逃犯條例嘅正式撤回，唔系因為六月嗰兩場一、二百萬人遊行喎，系因為之後我哋個個星期出嚟同佢打，搞到佢雞犬不寧，先至有之嘛。」
「我已經唔知做啲咩先可以達到我哋想要嘅目標，我哋做嘅，都只系搏一個可能性。我哋系無得返轉頭架，只可以將個情況一路推，推到去邊緣，睇嚇會發生咩事。我始終相信，對習近平嚟講，無論系牆裏面同香港，都系靠經濟繁榮去支撐佢嘅獨裁。所以我唔覺得佢會 risk到真系武力鎮壓香港人，跟住 risk自己成個主權。而如果我哋而家唔做嘅話，佢就會慢慢咁贏，慢慢清洗哩一代人，清洗成個香港。」
革命未至
然而，無論「革命」或「攬炒」，明顯很多香港人並未有這樣的準備，或不覺得有必要。阿亨都明白。「香港人好叻去適應件事，以前雨革成條路占咗，幾廿萬人聲嘶力竭咁嗌自己嘅訴求，但好快大家就知道，我系搭車行唔到哩條路啫，佢哋繼續做佢哋嘅嘢、我繼續做我嘅嘢。今次又系，星期六日，我可能出去支持嚇，跟住星期一至五照常返工。但革命嘅本質就系要完全推翻個社會制度，當你咁做時，其實大家現有嘅平靜少少嘅日常生活系唔會再存在的。大家一定要捨棄到、放開到哩樣嘢，先至有機會。」
他不認同成年人所講的「包袱」，更不同意年輕人是因為「無嘢輸」才去拼命。「我都讀三大，career prospect ok架，要生活我一定生活得到。我只系諗，我五年前第一次出嚟嘅時候仲可以和平佔領，但而家第一次參與社運嘅小朋友，已經擋警棍同橡膠子彈。咁我哋再下一代呢？佢一出嚟就系面對實彈。如果我哋覺得恐怖，佢哋面對嘅一定會比而家更恐怖。所以，我哋哩代人，真系有責任去做得幾多得幾多。」
阿芝讀的是專業科系，若順利畢業考到牌，她無論在香港或移民外國都會生活無憂。「如果無哩場運動，我應該可以日日開心玩、享受 U life？但而家就日日研究有咩策略，仲有啲咩可以做。」她的隊友都年紀相若，但決定用「火魔法」之時，無人討論過刑責或個人前途問題，「我哋只系考慮可行性、做唔做到。大家都講咗，驚嘅話可以而家退出，決定咗就唔好驚。」
「其實之前我哋每次出去，都預咗會俾人拉，安全返到屋企系 bonus，所以究竟系縱火定暴動，我哋都無特登再去研究個刑責。對我嚟講，無論坐兩、三年、定系坐十年，心情都系差唔多，都系無咗自由，無曬前途，都系唔能夠再繼續為香港抗爭。」面對隊友陸續被捕，她只說，「我希望俾人拉嗰個系我，而唔系佢哋囉。因為佢哋每一個做嘅嘢都可以比我更多，佢哋前途可以比我更好。」
如果要談代價
對於「留有用之軀」，或待群眾基礎更成熟才去做，阿芝不以為然，「總要有第一班人出嚟，先會有對群眾的影響力。犧牲得早唔早唔系我關心嘅嘢，我只系希望我哋今日嘅犧牲，可以喚醒到未醒覺嘅香港人，或者將來歷史可以證明到我哋今日咁做系正確。正如2016年嘅梁天琦，大部份人都覺得佢走得太前，但今日大家都叫住佢當日嘅口號。咁我希望今日嘅犧牲系有用啦，亦都相信會有用。因為，身邊有好多人都感染咗嘅，同學嗰啲，會由港豬變成留意嚇新聞，主動問嚇系咪要登記做選民。」
談到刑責，阿亨說知道、但唔想諗。「其實喺前線嘅我哋，好多人系寧願俾人用真槍射死，好過去坐監。咁講好似好 heavy...但大家嘅感覺系，如果有人喺前線被射死，可能人民嘅心態又會再有轉變。大家已經慣咗有人中槍、爆眼、殘廢、私刑、強姦輪姦雞姦，好似都慣曬咁，嗰啲浮屍，大家睇睇嚇都麻木咗。咁淨低一樣嘢可以喚醒你去行動嘅，可能就系有人現場死囉。」
他有時也會想，可能犧牲了都換不來改變，香港人仍繼續如常生活。「我諗唯有好歷史觀咁去睇，哩個就系一個 struggle嘅過程，至少你無放棄過 struggle，咁囉。相信個種子有埋喺度。即系...好似天琦、盧健民佢哋，坐六、七年嗰下，我諗佢哋都覺得，what the f**k？尤其是唔系帶頭嗰啲。但我好深信，2019年發生嘅事，一定系佢哋播下嘅種子嚟。咁…系囉，我哋之後會變成點，都唔到我哋控制。」
「我淨系會諗一樣嘢，我而家咁做，系因為我好相信哩件事。但系好多人，被捕之後呢，系會後悔自己參加過，好似多自己一個唔多、少一個唔少。當你俾人拉咗，你一定會咁樣諗，我都明。咁我淨系希望自己，如果真系要坐，唔好因為咁而覺得，自己做嘅嘢系錯架囉。」
「但系次次出門口，諗到，哇屌，可能之後六、七年無得返屋企，都系覺得好痴線。」
＊＊＊
（為尊重受訪者意願，文中受訪者皆使用化名）
